Iофэу ышIэрэм осэшхо зэрэфашIырэм ишыхьатэу дунэе наградэу орденэу «Урысыем и Щытхъузехь» зыфиIорэр Адыгэ Республикэм и Президентэу ТхьакIущынэ Аслъан къыфагъэшъошагъ. Мыщ фэгъэхьыгъэ торжественнэ зэхахьэу Правительствэм и Унэ тыгъуасэ щыкIуагъэм хэлэжьагъэх АР-м иминистрэхэм я Кабинет хэтхэр, АР-м и Къэралыгъо Совет — Хасэм идепутатхэр, нэмыкIхэри.

Iофтхьабзэм пэублэ псалъэ къыщишIызэ, орденэу «Урысыем и Щытхъузехь» зыфиIорэр афэзы­гъэшъошэрэ комитетым ипащэу Александр Кра­сильщиковым ащ тыным лъапсэу фэхъугъэм Тхьа­кIущынэ Аслъан щигъэгъозагъ. Ащ къызэрэхи­гъэ­щыгъэмкIэ, 1882-рэ илъэсым щыIэгъэ скульптурэу «Урысыем и Щытхъузехь» зыфиIорэр ары мыщ пэу­блэ фэхъугъэр. Илъэс зэкIэлъыкIохэм къакIоцI зи­IофшIагъэкIэ гъэхъагъэ зиIэхэм мы наградэр араты. Аужырэ уахътэм ар зыфагъэшъошагъэу зыцIэ къе­пIон плъэкIыщтхэм ащыщых Москва имэрэу Юрий Лужковыр, УФ-м и Федеральнэ ЗэIукIэ Федера­ци­емкIэ и Совет и Тхьаматэу Сергей Мироновыр ыкIи нэмыкI зэлъашIэрэ цIыф пчъагъэхэр.

— Адыгеим узэрипащэм дакIоу, непэ Урысыем имызакъоу дунаим щызэлъашIэрэ Мыекъопэ къэра­лыгъо технологическэ универстиетым изэхэщэн ыкIи ар ылъэ теуцонымкIэ Iофышхоу зэ­шIо­пхыгъэм, нэ­мыкI лъэныкъохэмкIи гъэхъагъэу уиIэхэм къакIэ­лъыкIуагъ мы тын лъапIэр, — къыIуагъ А.Красильщиковым Президентым орденыр къы­ритыжьызэ.

Нэужым къэгущыIэгъэ ТхьакIущынэ Аслъан тын лъапIэу къыфагъэшъошагъэмкIэ ащ фэгъэзэгъэ комитетым лъэшэу зэрэфэразэр къыхигъэщыгъ. Та­пэ­кIи Урысыем, Адыгеим хэхъоныгъэхэр ашIынхэм, цIыф къызэрыкIохэм ящыIэкIэ-псэукIэ нахьышIум фэщэгъэным, тызыщыпсэурэ Темыр Кавказым ­марныгъэрэ зэгурыIоныгъэрэ илъынхэм зэрафэбэ­нэщтымкIэ къызэрэугъоигъэхэр Президентым къы­гъэгугъагъэх.

Адыгэхэм агъэлъэпIэрэ цые шъуашэр хьэкIэ лъа­пIэу республикэм къеблэгъагъэм шIухьафтынэу ТхьакIущынэ Аслъан  ритыгъ.